Rais Kikwete amesema ushindi wa CCM hauna mashaka kwani mgombea wake ana sifa zote.

Mwenyekiti wa chama cha mapinduzi na rais wa jamuhuri wa muungano wa Tanzania Dk Jakaya Mrisho Kikwete amesema ushindi wa CCM hauna mashaka kwani mgombea wake ana sifa zote za kuwa kiongozi wa nchi na chama chake hakikubahatisha.

Rais Kikwete ameyasema hayo jijini Dar es Salaam wakati wa uzinduzi wa kampeni za uchaguzi mkuu unaotarajiwa kufanyika mwezi Octoba mwaka huu tukio liloenda sanjari na uzinduzi wa ilani ya chama hicho pamoja na kuwatambulisha mgombea urais na mgombea mwenza wake ambapo amesema kwa vigezo alivyonavyo Magufuli juu ya utendaji wake hodari anaamini watanzania watampa kura za kutosha.

 

Uzinduzi huo umehudhuriwa na marais wastaafu akiwemo Alhaji Hassan Mwinyi na Mh Benjamin William Mkapa na baadhi ya mawaziri wakuu wastaafu ambapo wakihutubia maelfu ya wakazi wa jiji la Dar es Salaam na viunga vyake marais hao wastaafu mbali na kummwagia sifa kedekede mgombea urais Mh John Magufuli na mgombea mwenza wake amewahakikishia watanzania kuwa kati ya wagombea nane waliopitishwa na NEC team bora ni Mh Magufuli na Mh Samia Suluhu.

 

Kwa upande wake rais wa Zanzibar na mwenyekiti wa baraza la mapinduzi Dk Ali Mohamed Shein amesema kwa historia ya Zanzibar na Tanganyika wanzanzibar watamuunga mkono Mh Magufuli kwa nguvu zote huku akiwataka watanzania wote waendelee kuwaelimisha wengine ili wasifanye mchezo wala wasijaribu kwani dola siku zote haijaribiwi.

 

Waziri mkuu mstaafu Mh Joseph Sinde Warioba akapata nafasi ya kuhutubia umati huo wa watu ambapo ameuleza kuwa mkutano mkuu wa CCM ulisikiliza maombi na kilio cha wana CCM ambao walitaka mgombea mwadilifu na mchapakazi na Mh Magufuli maeneo yote aliyopewa aliyamudu na matunda yake yameonekana.

 

Funga kazi ikaishia kwa mgombea urais Mh John Pombe Magufuli na mgombea mwenza wake Mh Samia Suluhu ambaye ameahidi pindi tu atakapopata ridhaa ya watanzania ataunda mahakama maalum ya kushughulikia mafisadi na wezi kwani ndio walioifikisha nchi hapa ilipo na atasimamia utawala bora ikiwa ni pamoja na kuheshimu mawazo ya vyama vingine yenye kujenga nchi.

 

Uzinduzi huo umepambwa na burudani mbalimbali ambazo wakati wote ziwafanya wahudhuriaji hao wasichoke zikiwemo nyimbo maridhawa za chama hicho.

Install Application ya JUNGUKUULEO Uweze Pata Habari Kirahisi Zaidi

xxxxxxxxxxxxx