Rais Kikwete aongoza mazishi ya Kada Mkongwe wa CCM Marehemu Mzee Peter Kisumo huko Usangi.....

Rais wa Jamhuri ya Muungano wa Tanzania,  Jakaya Kikwete jioni ya jana, ameungana na mamia ya waombolezaji katika mazishi ya mwanasiasa mkongwe wa Tanzania,  Peter Kisumo ambaye amezikwa nyumbani kwake katika Kijiji cha Ngujini, Wilaya ya Mwanza, Mkoa wa Kilimanjaro.

Akitokea Dodoma ambako amekuwa anaongoza vikao vya Chama cha Mapinduzi (CCM), Rais Kikwete akifuatana na Mama Salma Kikwete, alijiunga na mamia ya waombolezaji wakati wa salamu zilizokuwa zinatolewa na watu mbali mbali katika Kanisa ya Usharika wa Kilindu la Kanisa la Kiinjili la Kilutheri Tanzania (KKKT).

Mzee Peter Abdallah Kisumo ambaye alizaliwa Agosti Mosi, mwaka 1935 katika Wilaya ya Pare, Mkoa wa Kilimanjaro aliaga dunia Jumapili ya Agosti 2, mwaka huu, akiwa  na umri wa miaka 80.

Wakati wa kutoa salamu, Waziri wa Katiba na Sheria, Dkt. Asha Rose Migiro alitoa kwa niaba ya Serikali na kwa niaba ya  Rais Kikwete, na Mzee David Cleopa Msuya alitoa shukrani kwa niaba ya familia ya Mzee Kisumo.

Mara baada ya kumalizika kwa salamu hizo kwenye Kanisa la Usharika wa Kilindu,  Rais Kikwete aliongozana na mwili wa marehemu ambao ulikuwa umepambwa kwa bendera ya CCM kwenda Kijijini Ngujini kwa mazishi. Mwili wa Marehemu Kisumo uliteremshwa kaburini kiasi cha saa 11:15 jioni.

Mzee Kisumo ambaye alianza maisha yake ya kazi kama Bwana Shamba wa Serikali kabla ya kuingia katika uongozi wa vyama vya wafanyakazi alipata pia kuwa Waziri wa Serikali katika vipindi mbali mbali na Mkuu wa Mikoa ya Kilimanjaro (mara mbili), Singida, Pwani, Dar es Salaam na Mwanza.

 

Rais Kikwete aliondoka Kilimanjaro mara tu baada ya mzishi hayo kurejea Dodoma

Install Application ya JUNGUKUULEO Uweze Pata Habari Kirahisi Zaidi

xxxxxxxxxxxxx